ബീ ജേ പ്പീ= ബ്രാഹ്മണ ജാതി പാർട്ടി

ബീ ജേ പ്പീയിലെ ഇപ്പോഴത്തെയും എക്കാലത്തെയും അടിസ്ഥാന പ്രശ്നം, ബ്രാഹ്മണരും മറ്റുള്ള ജാതിക്കാരും തമ്മിലുള്ള അധികാര വടംവലിയാണ്. ആ പാ‍ർട്ടി കെട്ടിപ്പടുക്കാനും അതിനുവേണ്ടി നാട്ടുകാരുടെയും മറുനാട്ടുകാരുടെയും തെറി കേൾക്കാനും അബ്രാഹ്മണരായ സവർണരോ അവർണരോ വേണം. എന്നാൽ പ്രധാനമന്ത്രി സ്ഥാനമോ മുഖ്യമന്ത്രിസ്ഥാനമോ വരുമ്പോൾ‘മിതവാദികളും’ ‘പരിണത പ്രജ്ഞരുമായ’ ബ്രാഹ്മണർ രംഗത്തുവരും. ആഡ്വാണിയെ പ്രധാനമന്ത്രിയാക്കാത്തത് അദ്ദേഹം ‘തീവ്രവാദി’യായതുകൊണ്ടാണെന്ന ഭാഷ്യമാണു പുറത്തു കേൾക്കുക. എന്നാൽ അബ്രാഹ്മണനായതാണ് അദ്ദേഹത്തിന്റെ മുഖ്യ അയോഗ്യത(സിന്ധി ഖത്രിയാണദ്ദേഹം). ഇപ്പോൾ ആർ എസ് എസ് തലവനും അദ്ദേഹത്തിനെതിരെ രംഗത്തുവന്നതിനും കാരണം മറ്റൊന്നല്ല. അബ്രാഹ്മണനായ ഒരേയൊരു സർസംഘ് ചാലകേ ആർ എസ് എസ്സിനുണ്ടായിട്ടുള്ളൂ. അത് രജ്ജു ഭയ്യ എന്ന പേരിലറിയപെട്ടിരുന്ന പ്രൊഫ:രാജേന്ദ്ര സിങ് ആയിരുന്നു. അദ്ദേഹത്തെ ‘ആരോഗ്യപരമായ’ കാരണങ്ങളാൽ കാലാവധിക്കു മുൻപേ സ്ഥാനത്തു നിന്നു മാറ്റുകയും ചെയ്തു. ഈ രാജേന്ദ്ര സിങ് അബ്രാഹ്മണനാണ് എന്നു പറയുമ്പോൾ വല്ല പിന്നാക്കക്കാരനോ ദലിതനോ ആണെന്ന് ആരും കരുതില്ല്ലല്ലോ! ‘തൊട്ടുതാഴെ’ നിൽക്കുന്ന ക്ഷത്രിയനാണദ്ദേഹം. അവരെപ്പോലും സഹിക്കാൻ ബ്രാഹ്മണർ തയ്യാറല്ലെന്നതിന്റെ ലക്ഷണമാണ് വി പി സിങ്, ചന്ദ്രശേഖർ,അർജുൻ സിങ് തുടങ്ങിയവർക്ക് കോൺഗ്രസിലും ജസ്വന്ത് സിങ്ങിന് ഇപ്പോൾ ബീ ജേ പ്പീയിലും നേരിടേണ്ടിവന്നത്.

ഉമാഭാരതി,കല്യാൺ സിങ്,വിനയ് കത്യാർ, മോഡി തുടങ്ങിയ കടുത്ത ‘തീവ്രവാദികളാ’ണ് ബീജേപ്പീക്ക് ആളെ കൂട്ടിയ വർഗീയ കലാപങ്ങളുടെയും ബാബരി മസ്ജിദ് ധ്വംസനത്തിന്റെയും മറ്റും മുഖ്യ ശിൽ‌പ്പികൾ. ഇവരെല്ലാം പിന്നാക്കക്കാരാണ്; ഏറ്റവും വെറുക്കപ്പെടുന്നവരും. ഇതിൽ മോഡി ഒഴികെയുള്ളവർ പാർട്ടി നടപടികൾ നേരിട്ട് പുറത്തും അകത്തുമായി അവമാനിക്കപ്പെട്ടു കഴിയുന്നു. മോഡിക്കെതിരെ ഗുജറാത്തിലെ പട്ടിദാർ പട്ടേലുകൾ അതിശക്തമായി രംഗത്തുമുണ്ട്. ദലിതർക്കോ പിന്നാക്കക്കാർക്കോ എന്തെങ്കിലും അധികാരസ്ഥാനങ്ങൾ നൽകിയാൽത്തന്നെ അഴിമതി,പെണ്ണുകേസ് ഇതിലേതെങ്കിലും ‘അകപ്പെട്ട്’ ആരാലും സഹതപിക്കപ്പെടാതെ പുറത്താക്കപ്പെടും.അതോടെ അവരുടെ രാഷ്ട്രീയ ഭാവിയും തുലയും. ബംഗാരു ലക്ഷ്മണൻ എന്ന ദലിതനായ ബീജേപ്പീ പ്രസിഡന്റ് ഇപ്പോൾ എവിടെയാണുള്ളത്? ബീ ജേ പ്പീ എന്നാൽ ബ്രാഹ്മണ ജാതി പാർട്ടിയാണെന്ന് അതിലെ പിന്നാക്കക്കാരും ദലിതരും അബ്രാഹ്മണരായ സവർണരും പതുക്കെയാണെങ്കിലും മനസ്സിലാക്കി വരുന്നുണ്ട്. ജസ്വന്ത് സിങ്ങിന്റെ കലാപം അതിന്റെ ലക്ഷണമായെടുക്കാമെന്നു തോന്നുന്നു.